KSRTC യിൽ - പെൻഷൻ മുടങ്ങി

തിരുവനന്തപുരം: ഒരിടവേളയ്ക്ക് ശേഷം KSRTC യിൽ വീണ്ടും പെൻഷൻ പ്രതിസന്ധി. ചീഫ് ഓഫീസിലെ ഉദ്യോഗസ്ഥരുടെ അനാസ്ഥയാണ് ജീവനക്കാരുടെ ശമ്പളം മുടങ്ങാൻ കാരണമെന്നാണ് ആരോപണം. എന്നാൽ സാങ്കേതിക തകരാര്‍ മൂലമാണ് പെൻഷൻ വിതരണം മുടങ്ങുന്നതെന്നാണ് കെഎസ്ആര്‍ടിസിയുടെ വിശദീകരണം. 

നിലവിൽ സഹകരണ ബാങ്കുകളുടെ കൺസോര്‍ഷ്യം വഴിയാണ് KSRTC യിൽ പെൻഷൻ വിതരണം നടത്തുന്നത്. എല്ലാ മാസവും ഇരുപത്തിയഞ്ചാം തീയതിയാണ് പെൻഷൻ ബിൽ കെഎസ്ആര്‍ടിസി ചീഫ് ഓഫീസിൽ നിന്ന് സഹകരണ രജിസ്ട്രാര്‍ക്ക് നല്‍കുന്നത്. എന്നാൽ ഈ മാസം ഇതുവരെ ബിൽ സഹകരണ രജിസ്ട്രാര്‍ക്ക് ലഭിച്ചിട്ടില്ലെന്നാണ് റിപ്പോര്‍ട്ടുകള്‍. എന്നാൽ രജിസ്ട്രേഷൻ പുതുക്കുന്നതിലെ വീഴ്ച മൂലം പെൻഷൻ നിഷേധിക്കപ്പെട്ടവരെ ഉള്‍പ്പെടുത്തിയുള്ള സപ്ലിമെന്‍ററി ലിസ്റ്റ് നല്‍കുന്നതോടൊപ്പം പെൻഷൻ ബില്ലും കൈമാറുമെന്നാണ് KSRTC യുടെ വിശദീകരണം. 

രജിസ്ട്രേഷൻ പുതുക്കുന്നതിൽ ഉണ്ടായ വീഴ്ച മൂലം കഴിഞ്ഞ രണ്ട് വര്‍ഷത്തിനിടെ നിരവധി പേരാണ് പെൻഷൻ ലിസ്റ്റിൽ നിന്ന് പുറത്തായിട്ടുള്ളത്. എന്നാൽ ഇത്തരത്തിൽ പെൻഷൻ നിഷേധിക്കപ്പെട്ടവരെ ഉള്‍പ്പെടുത്താനായി സഹകരണ വകുപ്പ് സപ്ലിമെന്‍ററി ലിസ്റ്റ് ആവശ്യപ്പെട്ടിട്ടുണ്ട്. ഈ ലിസ്റ്റ് തിങ്കളാഴ്ചയോടെ തയ്യാറാകുമെന്നാണ് കെഎസ്ആര്‍ടിസിയുടെ വിശദീകരണം. ഇത് കൈമാറുന്നതോടൊപ്പം പെൻഷൻ ബില്ലും സമര്‍പ്പിക്കുമെന്ന് കെഎസ്ആര്‍ടിസി പറയുന്നു. 

അതേസമയം, സപ്ലിമെന്‍ററി ലിസ്റ്റ് നല്‍കുന്നതിന്‍റെ ഭാഗമായി പെൻഷൻ ബില്ലും വൈകിപ്പിച്ചതിനെതിരെയാണ് പെൻഷൻകാരുടെ പ്രതിഷേധം. ശനി, ഞായര്‍ ദിവസങ്ങളിലെ അവധിയ്ക്ക് ശേഷം തിങ്കളാഴ്ച ഓഫീസ് തുറക്കുമ്പോള്‍ മാത്രമേ ഇക്കാര്യത്തിൽ തീരുമാനമുണ്ടാകൂ. ഇതോടെ ഈ മാസം ആദ്യം ലഭിക്കേണ്ട കെഎസ്ആര്‍ടിസി പെൻഷൻ ലഭിക്കാൻ പതിനഞ്ചാം തീയതി വരെ കാത്തിരിക്കേണ്ടി വരുമെന്നതാണ് അവസ്ഥ.

RELATED STORIES