താലിബാന്‍ നേതാവ് ജീവിച്ചിരുന്നത് അമേരിക്കയുടെ മൂക്കിന്‍ തുമ്പില്‍

ഇസ്ലാമാബാദ്: താലിബാന്‍ സ്ഥാപകന്‍ മുല്ല ഒമര്‍ അഫ്‍ഗാനിസ്ഥാനിലെ അമേരിക്കന്‍ സൈനിക ക്യാമ്പുകള്‍ക്ക് തൊട്ടരികിലാണ് ഒളിച്ചു താമസിച്ചിരുന്നത് എന്ന് വെളിപ്പെടുത്തി പുസ്‍തകം. അമേരിക്ക ഒരു കോടി ഡോളര്‍ തലയ്ക്ക് വിലയിട്ട ഭീകരവാദിയാണ് ഒമര്‍. 

ഡച്ച്‌ ജേണലിസ്റ്റ് ബെറ്റെ ഡാം എഴുതിയ ജീവചരിത്രത്തിലാണ് അമേരിക്കന്‍ ഇന്‍റലിജന്‍സിന് നാണക്കേടാകുന്ന വിവരങ്ങള്‍ പ്രസിദ്ധീകരിച്ചിരിക്കുന്നത്. യുഎസ് സൈനിക ക്യാമ്പില്‍ നിന്നും വെറും മൂന്ന് കിലോ മീറ്റര്‍ അകലെയാണ് മുല്ല ഒമര്‍ ജീവിച്ചിരുന്നതെന്ന് പുസ്‍തകം പറയുന്നു. 

ന്യൂയോര്‍ക്ക് ഭീകരാക്രമണത്തിന് ശേഷമാണ് ഇയാളുടെ തലയ്ക്ക് അമേരിക്ക വിലയിട്ടത്. ഇയാള്‍ പാക്കിസ്ഥാനിലേക്ക് കടന്നുവെന്നാണ് യുഎസ് സൈന്യം കരുതിയിരുന്നത്. എന്നാല്‍ അഫ്‍ഗാനിസ്ഥാനിലെ ജന്മഗ്രാമത്തില്‍ ഏകാന്തജീവിതത്തിലായിരുന്നു ഒമര്‍ എന്നാണ് പുതിയെ വെളിപ്പെടുത്തല്‍. 

രണ്ട് തവണ ഈ മേഖലയില്‍ അമേരിക്കന്‍ സൈനികര്‍ പരിശോധന നടത്തിയിരുന്നു. അപ്പോഴെല്ലാം ഒമര്‍ പിടിയിലാകാതെ രക്ഷപെട്ടു. ഒരിക്കല്‍ ഒമര്‍ താമസിച്ചിരുന്ന വീട് പോലും അരിച്ചു പെറുക്കി അന്ന് രഹസ്യമായി നിര്‍മ്മിച്ച മുറിയില്‍ അടച്ചിരുന്ന് ഇയാള്‍ രക്ഷപെടുകയായിരുന്നു എന്നും വെളിപ്പെടുത്തല്‍ ഉണ്ട്.

1996 മുതല്‍ 2001 വരെ അഫ്‍ഗാനിസ്ഥാന്‍ താലിബാന്‍ അധീനതയില്‍ ആയിരുന്നു. ആ കാലഘട്ടത്തില്‍ സംഘടനയുടെ തലപ്പത്ത് ഒമര്‍ ആയിരുന്നു. പിന്നീട് താലിബാന്‍ ആത്മീയനേതാവ് എന്ന പേരില്‍ അറിയപ്പെട്ട ഒമര്‍, 2013 ല്‍ ആണ് മരിച്ചത്. ഇയാളുടെ മരണം രണ്ട് വര്‍ഷത്തോളം താലിബാന്‍ രഹസ്യമാക്കി വെക്കുകയും ചെയ്‍തു. 

RELATED STORIES