ജെറ്റ് എയര്‍വെയ്‍സ്‍ അബുദാബി വിമാന സര്‍വ്വീസുകള്‍ നിര്‍ത്തി

ന്യൂഡല്‍ഹി: അബുദാബിയിലേക്കുള്ള വിമാന സര്‍വ്വീസുകള്‍ നിര്‍ത്തുകയാണെന്ന് ജെറ്റ് എയര്‍വെയ്‍സ്‍. തിങ്കളാഴ്‍ച്ച മുതല്‍ സര്‍വീസ് ഉണ്ടാകില്ല. ജെറ്റ് വിമാനക്കമ്പനിയില്‍ 24 ശതമാനം ഓഹരികള്‍ എത്തിഹാദ് എയര്‍വെയ്‍സ്‍ വാങ്ങിയിരുന്നു. സാമ്പത്തിക പ്രതിസന്ധിയില്‍ ആയ ജെറ്റ് എയര്‍വെയ്‍സ്‍ എത്തിഹാദ് നിക്ഷേപത്തിന് കാക്കുകയാണ്. 

ജെറ്റ് - എത്തിഹാദ് വിമാനക്കമ്പനികളാണ് കഴിഞ്ഞ കുറച്ചുവര്‍ഷങ്ങളായി ഇന്ത്യയില്‍ നിന്നും ഇന്ത്യയിലേക്കും കൂടുതല്‍ രാജ്യാന്തര സര്‍വ്വീസുകള്‍ നടത്തുന്നത്. അബുദാബി ഉള്‍പ്പെടെയുള്ള മിഡില്‍ ഈസ്റ്റ് നഗരങ്ങളിലേക്കും യൂറോപ്പ്, ആഫ്രിക്ക, അമേരിക്ക എന്നിവിടങ്ങളിലേക്കും സിംഹഭാഗം യാത്രക്കാരെയും എത്തിക്കുന്നത് ജെറ്റ് - എത്തിഹാദ് സംരഭമാണ്. 

അബുദാബി സര്‍വ്വീസുകള്‍ നിര്‍ത്താന്‍ തീരുമാനിച്ചതോടെ ഇന്ത്യയില്‍ നിന്നുള്ള രാജ്യാന്തര യാത്രക്കാരുടെ നീക്കത്തിലും തടസ്സം നേരിടും. വളരെ പെട്ടന്ന് വിമാനങ്ങള്‍ റദ്ദാക്കാന്‍ തീരുമാനിച്ചതോടെ അബുബാദി വഴി യാത്ര ചെയ്യുന്നവര്‍ക്ക് തിരിച്ചടി നേരിടും. 

ജെറ്റ് യാത്രികരെ ഉള്‍ക്കൊള്ളിക്കാന്‍ ചില സര്‍വ്വീസുകള്‍ക്ക് എത്തിഹാദ് തയറാണെങ്കിലും എയര്‍ ഇന്ത്യ പോലെയുള്ള വിമാനക്കമ്പനികള്‍ ജെറ്റ് യാത്രികരെ കൊണ്ടുപോകില്ലെന്ന് അറിയിച്ചു കഴിഞ്ഞു.

മൂന്നു വര്‍ഷങ്ങള്‍ക്ക് മുന്‍പ് ജെറ്റ് - എത്തിഹാദ് പങ്കാളിത്തം ആരംഭിച്ചപ്പോള്‍ അബുദാബിയില്‍ നിന്ന് പ്രതിവാരം 250 വിമാനങ്ങളാണ് ഇന്ത്യന്‍ നഗരങ്ങളിലേക്ക് പറന്നിരുന്നത്. സാമ്പത്തികമായി കമ്പനികള്‍ക്ക് തിരിച്ചടി നേരിട്ടപ്പോള്‍ വലിയ തോതില്‍ സര്‍വ്വീസുകള്‍ വെട്ടിച്ചുരുക്കി. 

സാമ്പത്തിക പ്രശ്‍നമല്ല വിമാനങ്ങള്‍ റദ്ദാക്കാന്‍ കാരണമെന്ന് ജെറ്റ് എയര്‍വെയ്‍സ്‍ പറയുന്നത്. തങ്ങളുടെ റൂട്ടുകളില്‍ വന്ന നിയന്ത്രണവും 50 വിമാനങ്ങള്‍ പലകാരണങ്ങള്‍ കൊണ്ട് നിലത്തിറക്കേണ്ടി വന്നതുമാണ് സര്‍വ്വീസ് മുടങ്ങാന്‍ കാരണമെന്നാണ് കമ്പനി പറയുന്നത്. 

RELATED STORIES