വെസ്റ്റ്‌ നൈൽ പനി; പഠന സംഘം ഇന്ന് മലപ്പുറത്ത്

മലപ്പുറം: വെസ്റ്റ് നൈൽ വൈറസിനെക്കുറിച്ച് പഠിക്കാൻ വിദഗ്ദ സംഘം ഇന്ന് മലപ്പുറത്ത്. സംസ്ഥാന എൻഡമോളജി യൂണിറ്റിലേയും കോട്ടയം ആസ്ഥാനമാക്കി പ്രവർത്തിക്കുന്ന വെക്ടർ കൺട്രോൾ റിസർച്ച് സെന്ററിലേയും ഉദ്യോഗസ്ഥരാണ് ഇന്ന് മലപ്പുറത്ത് എത്തുന്നത്. വൈറസ് ബാധയേറ്റ് മരിച്ച വേങ്ങര സ്വദേശി മുഹമ്മദ് ഷാന്റെ എ ആർ നഗറിന് സമീപത്തെ വിടിന് സമീപമായിരിക്കും ആദ്യം പരിശോധന നടത്തുക. 

കൊതുകുകളെ ശേഖരിച്ച് പരിശോധനയ്ക്ക് അയക്കാനും വൈറസ് ബാധ എങ്ങനെയുണ്ടായെന്ന് പരിശോധിക്കാനുമാണ് സംഘം ശ്രമിക്കുക. ഉച്ചതിരിഞ്ഞ് മലപ്പുറം ജില്ലാ മെഡിക്കൽ ഓഫീസർ ഡോ കെ സക്കീനയുമായും സംഘം കൂടിക്കാഴ്ച നടത്തും. വടക്കൻ കേരളത്തിൽ വെസ്റ്റ് നൈൽ പനിക്കെതിരെ ജാഗ്രത പ്രഖ്യാപിച്ചിട്ടുണ്ട്. പക്ഷികളുടേയും മൃഗങ്ങളുടേയും രക്ത സാമ്പിൾ പരിശോധനയ്ക്കായി എടുത്തിട്ടുണ്ട്. വൈറസിനെ പ്രതിരോധിക്കാനുള്ള വാക്സിൻ ഇനിയും കണ്ടെത്തിയിട്ടില്ല. കൊതുകിനെ നശിപ്പിക്കുകയാണ് വൈറസ് പടരുന്നത് തടയാനുള്ള മാർഗ്ഗം. 

രോഗലക്ഷണങ്ങളുമായി ആരെങ്കിലും എത്തിയാൽ പ്രത്യേകം നിരീക്ഷിക്കാനും ചികിത്സ നൽകാനും ആരോഗ്യ മന്ത്രി നിർദ്ദേശിച്ചിട്ടുണ്ട്. എന്നാൽ ആശങ്കപ്പെടേണ്ട സാഹചര്യമില്ലെന്നും ആരോഗ്യ മന്ത്രി കെ കെ ശൈലജ പറഞ്ഞു. മനുഷ്യരിൽനിന്നും മനുഷ്യരിലേക്ക് പകരുന്ന രോഗമല്ല വെസ്റ്റ് നൈലെന്നും മന്ത്രി വ്യക്തമാക്കി. 

ക്യൂലക്സ് വിഭാഗത്തിൽപ്പെട്ട കൊതുകുകളാണ് വൈറസ് വാഹകർ. പനി പടരാതിരിക്കുന്നതിന് കൊതുക് നശീകരണം ഉറപ്പാക്കണമെന്ന് ആരോഗ്യ വകുപ്പ് നിർദ്ദേശിച്ചിട്ടുണ്ട്.

RELATED STORIES