ആലപ്പുഴ ജില്ലയിൽ എയിംസ് സ്ഥാപിക്കാനുള്ള ആവശ്യവുമായി പ്രാദേശിക ജനകീയ കൂട്ടായ്മകൾ

Reporter: News Desk 03-Oct-2025
1,451
ആലപ്പുഴ ജില്ലയിൽ എയിംസ് സ്ഥാപിക്കാനുള്ള ആവശ്യവുമായി പ്രാദേശിക ജനകീയ കൂട്ടായ്മകൾ

വാട്സാപ്പ് ഗ്രൂപ്പുകളിൽ നിന്ന് ആരംഭിച്ച് ആക്ഷൻ കൗൺസിൽ രൂപീകരിക്കപ്പെടുകയും, ഒപ്പുശേഖരണവും വിവിധ പരിപാടികളും സംഘടിപ്പിക്കാനുമാണ് തീരുമാനിച്ചിരിക്കുന്നത്. എയിംസ് സ്ഥാപിക്കുന്ന വിഷയം വീണ്ടും ചർച്ചയിലായിരിക്കുന്നത്, കേന്ദ്രമന്ത്രി സുരേഷ് ഗോപിയുടെ ‘ആലപ്പുഴയിൽ എയിംസ് വേണം’ എന്ന പ്രസ്താവനയെ തുടർന്നാണ്. എന്നാൽ, സംസ്ഥാനത്തെ ബിജെപി നേതാക്കൾക്കിടയിൽ എവിടെ എയിംസ് വരണം എന്നതിൽ ഭിന്നത നിലനിൽക്കുന്നത് ശ്രദ്ധേയമാണ്.

ആലപ്പുഴയിൽ തന്നെ എയിംസ് സ്ഥാപിക്കാൻ നിരവധി സാധ്യതകളുണ്ടെന്ന് ജനകീയ കൂട്ടായ്മകൾ ചൂണ്ടിക്കാണിക്കുന്നു. വി.എസ്. സർക്കാരിന്റെ കാലത്ത് ഇൻഫോ പാർക്കിനായി എടുത്തെങ്കിലും പുരോഗതി കൈവരിക്കാതെ പോയ ഗാന്ധി സ്മൃതിവനത്തിലെ 174.79 ഹെക്ടർ ഭൂമിയാണ് എയിംസിന് ഏറ്റവും അനുയോജ്യമെന്ന് അഭിപ്രായപ്പെടുന്നു. സർക്കാർ ഏറ്റെടുത്തിട്ടും വർഷങ്ങളായി ഉപയോഗിക്കാതെ കിടക്കുന്ന സ്ഥലങ്ങൾ, അതായത് ചേർത്തലയിലെ എക്സൽ ഗ്ലാസ് പദ്ധതി സ്ഥലവും, ഉദയ സ്റ്റുഡിയോ സ്ഥലം, ഹരിപ്പാട് എൻ.ടി.പി.സി പദ്ധതിക്കായി ഏറ്റെടുത്ത 150 ഏക്കർ സ്ഥലവും, നൂറനാട് ലെപ്രസി സാനിറ്റോറിയത്തിനോട് ചേർന്നുള്ള ഭൂമിയും എയിംസ് സ്ഥാപിക്കാനുള്ള സ്ഥലങ്ങളായി ചർച്ച ചെയ്യപ്പെടുന്നു.

‘We need AIIMS Harippad, We need AIIMS Cherthala’ എന്ന മുദ്രാവാക്യങ്ങളോടെ പ്രാദേശിക സോഷ്യൽ മീഡിയ ഗ്രൂപ്പുകളും സജീവമാണ്. വിവിധ പ്രദേശങ്ങളിൽ നിന്നുള്ള കൂട്ടായ്മകൾ അവരവരുടെ പ്രദേശമാണ് എയിംസിന് ഏറ്റവും അനുയോജ്യമെന്ന വാദവുമായി മുന്നോട്ടുവരുന്നു. എന്നാൽ, സംസ്ഥാന സർക്കാരിന്റെ നിലപാട്, “സ്ഥലം എവിടെയായാലും പ്രശ്‌നം ഇല്ല, ആദ്യം കേന്ദ്രം അനുമതി നൽകണം” എന്നതാണ്. ഇതോടെ എയിംസ് എവിടെയാകണം എന്ന ചർച്ചകൾ രാഷ്ട്രീയപരമായും സാമൂഹികപരമായും ശക്തമായി മുന്നോട്ട് പോകുകയാണ്.

RELATED STORIES