ലോക കേരളാസഭാ സമ്മേളനത്തിലെ പണപ്പിരിവില്‍ തെറ്റില്ലെന്ന് എ.കെ. ബാലന്‍

Reporter: News Desk 02-Jun-2023
3,632
ലോക കേരളാസഭാ സമ്മേളനത്തിലെ പണപ്പിരിവില്‍ തെറ്റില്ലെന്ന് എ.കെ. ബാലന്‍

മുമ്പ് നടന്ന സമ്മേളനങ്ങളിലും സ്‌പോണ്‍സര്‍ഷിപ്പ് സ്വീകരിച്ചതാണെന്നും പറഞ്ഞു. വിവിധ രാജ്യങ്ങളിലെ മലയാളികളുടെ കുടുംബ സംഗമമാണ് ലോക കേരളാസഭാ സമ്മേളനമെന്നും പറഞ്ഞു. ഖജനാവില്‍ നിന്നും പണം എടുക്കാത്ത സാഹചര്യത്തില്‍ പിന്നെ എങ്ങിനെ പണം കണ്ടെത്തുമെന്നും ചോദിച്ചു.


സ്‌പോണ്‍സര്‍ഷിപ്പാണ് നടന്നിരിക്കുന്നതെന്നും അത് മുമ്പും ദുബായിലും ലണ്ടനിലൂം നടന്ന പരിപാടിയിലും ഇത് സ്വീകരിച്ചിട്ടുണ്ടെന്നും പറഞ്ഞു. ലോക കേരളസഭയുടെ ആദ്യ സമ്മേളനം നടന്ന ദുബായിലും രണ്ടാമത് നടന്ന ലണ്ടനിലും സ്പോണ്‍സര്‍ഷിപ്പ് ഉണ്ടായിരുന്നു. പ്രവാസി മലയാളികള്‍ മനസ്സറിഞ്ഞ് സഹായിക്കുന്നതില്‍ അസൂയയെന്തിനെന്നും ചോദിച്ചു. പരിപാടിയുടെ കണക്കുകള്‍ ഓഡിറ്റ് ചെയ്യുന്നതാണെന്നും പറഞ്ഞു. മുഖ്യമന്ത്രിയുടെ ഇമേജ് പ്രതിപക്ഷം വിചാരിച്ചാല്‍ ഇല്ലാതാക്കാന്‍ കഴിയില്ലെന്നും പ്രവാസികളെ അപമാനിക്കരുതെന്നും എ.കെ. ബാലന്‍ പറഞ്ഞു.

ഭാരിച്ച ചെലവ് വരുന്ന പരിപാടിയിലെ സ്‌പോണ്‍സര്‍ഷിപ്പിനെതിരേ നേരത്തേ പ്രതിപക്ഷം രംഗത്ത് വന്നിരുന്നു. ഇന്നലെ രൂക്ഷ വിമര്‍ശനമാണ് പ്രതിപക്ഷ നേതാവ് വി.ഡി. സതീശന്‍ നടത്തിയത്. മുഖ്യമന്ത്രിയെ കാണാന്‍ പണം മുടക്കേണ്ടി വരുന്നത് അപമാനകരമാണെന്നും അത്തരം പരിപാടിയില്‍ മുഖ്യമന്ത്രി പങ്കെടുക്കരുതെന്നും പ്രവാസികളെ സമ്പന്നരെന്നും ദരിദ്രരെന്നും വേര്‍തിരിച്ച് ആക്ഷേപിക്കരുതെന്നും പറഞ്ഞിരുന്നു.

ഇതോടെയാണ് മുഖ്യമന്ത്രിയുടെ പരിപാടിയ്ക്ക് സിപിഎം പാര്‍ട്ടി തന്നെ പിന്തുണയുമായി രംഗത്ത് വന്നിരിക്കുന്നത്. സ്‌പോണ്‍സര്‍ഷിപ്പുമായി ബന്ധപ്പെട്ട് വിമര്‍ശനങ്ങള്‍ ഉയര്‍ന്ന സാഹചര്യത്തില്‍ സമ്മേളന നടത്തിപ്പില്‍ സുതാര്യത ഉറപ്പുവരുത്തുമെന്നും സാമ്പത്തിക ഉറവിടം ജനങ്ങളെ ബോധ്യപ്പെടുത്തുമെന്നും സംഘാടക സമിതി അറിയിച്ചു. കേരള സര്‍ക്കാരില്‍ നിന്ന് പണം ആവശ്യപ്പെട്ടില്ലെന്നും തന്നിട്ടില്ലെന്നും പറഞ്ഞു.

ഏകദേശം ആറര ലക്ഷം ഡോളര്‍(അഞ്ചരക്കോടി)ആണ് ആവശ്യമായി വരുന്നത്. ടൈംസ് സ്‌ക്വയറില്‍ നടക്കുന്ന സമാപന സമ്മേളനത്തിന് പ്രത്യേക വേദിയൊരുക്കും. രണ്ടു മണിക്കൂര്‍ മുഖ്യമന്ത്രി സംസാരിക്കുന്ന പരിപാടിക്കായി ചിലവാക്കുന്നത് ഏകദേശം രണ്ടുകോടി രൂപയാണ് ചിലവ് പ്രതീക്ഷിക്കുന്നത്. സ്‌പോണ്‍സര്‍ഷിപ്പ് അമേരിക്കന്‍ രീതിയാണെന്ന് ന്യായീകരിച്ച് നോര്‍ക്കയും പണപ്പിരിവുമായി മുമ്പോട്ട് പോകാന്‍ തീരുമാനം എടുത്തിരിക്കുകയാണ്. ജൂണ്‍ 9 മുതല്‍ 11 വരെയാണ് ന്യൂയോര്‍ക്കില്‍ ലോക കേരളാസഭ സമ്മേളനം നടക്കുന്നത്.

RELATED STORIES