ബിഹാറില്‍ മൂന്നു വയസ്സുകാരിയെ ബലാത്സംഗം ചെയ്ത് കൊന്ന് കുഴിച്ചിട്ടു

Reporter: News Desk 26-Nov-2023
1,569
ബിഹാറില്‍ മൂന്നു വയസ്സുകാരിയെ ബലാത്സംഗം ചെയ്ത് കൊന്ന് കുഴിച്ചിട്ടു

വെള്ളിയാഴ്ച രാത്രിയാണ് മുസാഫര്‍പുരില്‍ മൂന്നുവയസ്സുകാരിയെ അതിക്രൂരമായി കൊലപ്പെടുത്തിയത്. സംഭവത്തില്‍ പ്രതിയായ ലാല്‍ ബാബു(20)വിനെ പോലീസ് അറസ്റ്റ് ചെയ്തു.

മാതാപിതാക്കളോടൊപ്പം ബന്ധുവീട്ടിലെത്തിയ പെണ്‍കുട്ടിയാണ് അതിക്രൂരമായ ബലാത്സംഗത്തിനിരയായി കൊല്ലപ്പെട്ടത്. പെണ്‍കുട്ടിയെ സമീപവാസിയായ ലാല്‍ ബാബു വെള്ളിയാഴ്ച വൈകിട്ട് കളിക്കാനായി പുറത്തേക്ക് കൊണ്ടുപോയിരുന്നു. കുട്ടിയുടെ അമ്മയോട് അനുവാദം ചോദിച്ചാണ് ആദ്യതവണ ഇയാള്‍ കുട്ടിയെ വീടിന് പുറത്തേക്ക് കൊണ്ടുപോയത്. അല്പസമയത്തിന് ശേഷം കുട്ടിയെ തിരികെ വീട്ടിലെത്തിക്കുകയും ചെയ്തു. തുടര്‍ന്ന് രാത്രി പത്തുമണിയോടെ ആരുമറിയാതെ ഇയാള്‍ വീണ്ടും കുട്ടിയെ വീട്ടില്‍നിന്ന് കൂട്ടിക്കൊണ്ടുപോയെന്നാണ് പോലീസ് പറയുന്നത്. തുടര്‍ന്ന് ആളൊഴിഞ്ഞ സ്ഥലത്തെത്തിച്ച് പെണ്‍കുട്ടിയെ ബലാത്സംഗം ചെയ്ത് കൊലപ്പെടുത്തുകയും കൃഷിയിടത്തില്‍ മൃതദേഹം കുഴിച്ചിടുകയുമായിരുന്നു.

വെള്ളിയാഴ്ച രാത്രി കുട്ടിയെ കാണാതായതോടെയാണ് മാതാപിതാക്കളും ബന്ധുക്കളും തിരച്ചില്‍ ആരംഭിച്ചത്. സംശയത്തെത്തുടര്‍ന്ന് ഇവര്‍ ലാല്‍ബാബുവിനെ ഫോണില്‍ വിളിച്ചെങ്കിലും ഇയാള്‍ പ്രതികരിച്ചില്ല. ഇതോടെ ബന്ധുക്കള്‍ പോലീസിനെ വിവരമറിയിക്കുകയും ലാല്‍ ബാബുവിനെ കസ്റ്റഡിയിലെടുക്കുകയുമായിരുന്നു. തുടര്‍ന്ന് വെള്ളിയാഴ്ച അര്‍ധരാത്രിയോടെയാണ് ബന്ധുവീട്ടില്‍നിന്ന് 200 മീറ്റര്‍ അകലെയുളള കൃഷിയിടത്തില്‍നിന്ന് പെണ്‍കുട്ടിയുടെ മൃതദേഹം കണ്ടെടുത്തത്.

RELATED STORIES