മക്കള്‍ ഉപേക്ഷിച്ച് പോയ വയോധിക മരണത്തിന് കീഴടങ്ങി

Reporter: News Desk 21-Jan-2024
1,152
മക്കള്‍ ഉപേക്ഷിച്ച് പോയ വയോധിക മരണത്തിന് കീഴടങ്ങി

കുമളി അട്ടപ്പള്ളം സ്വദേശി അന്നക്കുട്ടി മാത്യു ആണ് മരിച്ചത്. മക്കള്‍ ഉപേക്ഷിച്ചതിനെ തുടര്‍ന്ന് വാടക വീട്ടില്‍ ഒറ്റക്ക് കഴിഞ്ഞിരുന്ന അന്നക്കുട്ടിയെ പോലീസ് കോട്ടയം മെഡിക്കല്‍ കോളജ് ആശുപത്രിയില്‍ എത്തിച്ചിരുന്നു. ചികിത്സയ്ക്കിടെയാണ് മരണം.

അന്നക്കുട്ടി കഴിഞ്ഞ ദിവസം വീണ് വലതു കൈ ഒടിഞ്ഞിരുന്നു. മറ്റ് രോഗങ്ങളും ഉണ്ടായിരുന്നു. വെള്ളിയാഴ്ച ഉച്ചയോടെ നാട്ടുകാരും പഞ്ചായത്തംഗവും അറിയിച്ചതിനെ തുടര്‍ന്നാണ് പോലീസ് അന്നക്കുട്ടിയുടെ വീട്ടിലെത്തിയത്. ഭക്ഷണവും മരുന്നുമില്ലാതെ അവശനിലയിലായിരുന്ന അന്നക്കുട്ടിയെ ഉടന്‍ തന്നെ ആശുപത്രിയിലെത്തിച്ചു. ഭര്‍ത്താവ് മരിച്ച അന്നക്കുട്ടിക്ക് ഒരു മകനും മകളുമുണ്ട്. ഇരുവരും വിവാഹം കഴിച്ച് കുമളിയില്‍ തന്നെയാണ് താമസം.

മകന്റെ സംരക്ഷണത്തിലായിരുന്നു അന്നക്കുട്ടി കഴിഞ്ഞിരുന്നത്. സ്വത്ത് വിറ്റുകിട്ടിയ പണം കൈക്കലാക്കിയ മക്കള്‍ വാടക വീടെടുത്ത് അന്നക്കുട്ടിയെ പാര്‍പ്പിച്ചിരിക്കുകയായിരുന്നു. മകള്‍ മാസം തോറും നല്‍കിയിരുന്ന ചെറിയ തുക ഉപയോഗിച്ചാണ് ഒരു വര്‍ഷത്തോളമായി അന്നക്കുട്ടി കഴിഞ്ഞിരുന്നത്.പോലീസ് അറിയച്ചതനുസരിച്ച് ആശുപത്രിയിലെത്തിയ ബാങ്ക് ജീവനക്കാരനായ മകന്‍ അമ്മയെ ഏറ്റെടുക്കാന്‍ തയ്യാറായില്ല.

വനിതാ പോലീസുകാരാണ് ആശുപത്രിയില്‍ അന്നക്കുട്ടിയെ പരിചരിച്ചിരുന്നത്. സംഭവത്തില്‍ ജില്ലാ കലക്ടര്‍ക്കും റിപ്പോര്‍ട്ട് നല്‍കിയിട്ടുണ്ട്.

RELATED STORIES